يا بني احنا بنشتري راجل .. اليومين دول الجملة دي اختفت مش هقول ف كل مصر .. هقول ف اغلب البيوت المصرية .. و الاهالي دلوقتي بيبالغوا قوي ف طلباتهم علي العريس زي ميكون ذنبة انة حب بنتهم و اتقدم علشان يتجوزها .. و الامثلة علي كدة كتير جدا يعني مثلا مرة كنت قاعد ف الكلية و لقيت واحدة زميلتنا - هيا بيني و بينكم مش حلوة قوي يعني - قاعدة و زعلانة قوي .. قلتلها مالك يا ستي ؟ شايلة طاجن ستك لية ؟ تقولي انت عارف عصام .. قلتلها ايوة طبعا .. انا سمعت انة كان رايح يكلم والدك امبارح .. قالتلي ايوة .. بس طلع مبيحبنيش .. قلنلها ازاي يا بنتي دا الواد كان متشحتف عليكي .. قالتلي بابا قالة تمضيي علي وصل امانة بخمسين الف جنية و انا والله يا احمد علشان بحبة اقنعت بابا انهم يبقوا خمسة و تلاتين بس و لقيت عصام مرضاش .. مبيحبنيش .. مبيحبنيش انا طبعا ضربت كف علي كف ..هو رايح يتقدم لواحدة ولا بيشتري غسالة بالقسط
وموقف تاني برضة حصل واحدة مخطوبة لتاجر .. هو الصراحة الولد ابن حلال و راجل .. عزمهم مرة علي البحر و كانت والدتة عاملة مكرونة بالباشميل و اليوم معدي ظريف .. بس كان فية مشكلة واحدة .. ام خطبيبتة .. فكروا كدة اية ممكن يعمل مشكلة ف الكلام اللي انا قلتة .. اقولكم انا .. اصلة مجابش لحمة جنب المكرونة .. ( بيئة ) زي مقالت علية ام خطيبتة - السابقة - .. بذمتكم دا كلام جوازة تتفشكل علشان حتة لحمة
موقف تالت و دا بقي حصل ف الكوشة .. العريس و العروسة خلاص كتبوا الكتاب و هما قاعدين ف الفرح و شوية و هيطلعوا علي بيتهم .. و فجاة و من غير اي مبررات لقينا ابو العروسة بيزعق للعريس .. و السبب انة جايب تاكسي علشان يزف فية مراتة .. و الكل يقول لابو العروسة يا عم الحج مش مشكلة يعني لو اتزفت ف ليموزين حتي هيفرق معاها خلاص اتجوزوا و هيروحوا بيتهم و دا ابدا .. المهم كلمة من هنا و كلمة من هنا و هوب رما عليها يمين الطلاق .. وفين - علي الكوشة
و الامثلة كتير جدا علي طلبات الاهالي الغريبة من الشباب ..و زي ميكون الاهالي مش عايشين ف نفس الدنيا اللي احنا عايشين فيها و مش شايفين الشاب بيتعب قد اية علشان يكون نفسة و يجيب شقة و يوضبها و يجهزها .. ودا خلي فية ظاهرة منتشرة قوي ف شوارعنا و هيا ظاهرة الانتمة - يعني كل اتنين ماشين مع بعض و ظاهرة الجواز العرفي و ظاهرة الطلاق كمان ..ولو مش مصدقيني روحوا محاكم الاسرة و شوفوا وف الاخر تلاقي الاب او الام يضربوا كف علي كف و يقولوا باستغراب هو لية البنت قاعدة ف البيت متجوزتش لحد دلوقتي رغم انها زي القمر؟؟؟
و العاقبة عندكم ف المسرات
1 comment:
اقول راى بس من غير زعل ...... اصل ماعدش فى رجالة فى السوق دلوقتى علشان يتقال لهم احنى بنشترى راجاله ..... وبرضو الامثله كتير عندى يعنى اللى بتاع ماما ومايقدرش ياخد قرار من غير ما ماما تأشر علية ولى مش قادر يتحمل مسؤلية واللى بيتسلى ببنات الناس واللى داخل يسال اهل العروسة هى العروسة عندها شقة ولا لا وغيروا وغيروا ياعم الازمة مش فى الاهالى الازمة فى الرجالة ............ اللى ماتو ف73 الله يرحمهم
Post a Comment