متيجي نركب الة الزمن

يلا انت لسة نايم .. قوم هتتاخر ."

كلمة اكيد بتسمعها كل يوم سواء من الحاجة علشان تقوم تروح مدرستك او الشغل او من المدام لو انت متجوز .. تشد عليك البطانية علشان تكسب دقيقة ولا دقيقتين نوم .. بعدها تقوم تلبس الشبشب و تزحف بية لحد متوصل للحمام و انت عمال تهرش في راسك و تتاوب كانك ناوي تبلع فرخة .. تفتح الدش تلاقي المية اللي احنا بندرسها من ايام ابتدائي انها ليس لها طعم ولا لون ولا حتي ريحة بقدرة قادر اتغير خواصها وبقت بلون و ريحة ويمكن - ولية يمكن خليها اكيد - طعم .. تلبس هدومك بسسرعة و تخطف شنطتك واي لقمة من علي الطرابيزة وانت نازل ومش هوصفلك وقفتك وانت مستني الاتوبيس ولا الميكروباص لحد متتشعبط وتوصل لشركتك او مدرستك .. اول متقعد علي المكتب وتطلع في الخباثة سندوتش فول او طعمية سخنة وتاكلة وانت بتتمني ان المدير بتاعك ميشوفاكش والا...المهم ربك حليم ستار

اتخيل بقي كدة انك بقدرة قادر لقيت الة الزمن طبعا هتتمني انك تعيش في اي زمن تاني مختلف عن الدوشة و الجري اللي انت كنت فية .. تختار اية .. الزراير كلها قدامك كل اللي عليك انك تظبط علي الزمن اللي انت عايز تروحة .. تروح تعيش وسط الفراعنة و الهكسوس و احمس و الاهرامات ولا تفكر تطلع علي عصر الممالييك و قطز و هولاكو - اللي اتلزقت صورتة في راسنا بصورة احمد ماهر وهو بياكل فخد ضاني بقطمة واحدة .. ولا اقولك تعالي نرجع لزمن جدي و جدك .. نظبط الزراير علي سنة 1919 .. تصدق لايقة البدلة عليك و الطربوش الاحمر ابو زر

.تعالي نقعد علي القهوة اللي هناك ونمسك الجرنان نقرا فية شوية وكوبايتين شاي نظبط بيهم دماغنا .. ونحرك المنشة يمين و شمال لزوم الوجاهة .. جعان .. تعالي نندة الواد اللي شايل سميط وجبنة و بيض دا .. بقرش صاغ ممكن تجيب عشرين سميطة و قد تلاتاشر خمستاشر بيضة و كام حتة جبنة .. تمام كدة يا ريس .. تمام .. تعدي واحدة لابسة ملاية لف ومدارية وشها مش باين منها الا عينيها تروح انت مميل الطربوش لقدام شوية لزوم الوجاهة و عادل شنبك الدوجلاس وبس .. ايوة بس مهو زمان مكنش فية حركات المعكسات بتاعت انت يا قمر رايح علي فين كدة منوصلك ولا كان فية رقم الجميل كام علشان اديلة مسد .. اخرها زمان انك تحلم بالامورة اللي عدت ولا هتشوف منها وشها الا بعد الجواز واقل مسافة بينك و بيينها حوالي عشرة متر وانت بتكلمها ولو انت محظوظ ممكن تمسك ايدها وانت خاطب و تتلفت حواليك لابوها يشوفك و يدبحك .. تسرح بقي شوية مع صوت المطربة الصاعدة ام كلثوم اللي بدات تشد البساط من تحت رجل منيرة المهدية و المظ .. شوية و تلاقي مظاهرة طالعة والناس بتهتف سعد سعد يحيا سعد وتلاقي عساكر انجليز عاملين كوردون ولابسين الشورتات الكاكي و الكورة الحمرا اللي علي الطاقية

الساعة دلوقت عدت تمانية يلا تروح بيتك قبل مابوك يقتلك طبعا ماانت مش هتقولة انك كنت سهران في كافية في نص البلد لييقول ابني بيشرب منكر ويخلي امينة تسن السكينة .. المهم توصل البيت تلاقي اختك واقفة علي السلم ماسكة لمبة الجاز علشان تنورلك .. تلبس الجلابية المخططة و الطاقية اللي برضة مخططة من نفس اللون و تشد اللحاف و تنام

.. اصحي يا استاذ انت لسة نايم هتتاخر عن الشغل ".. تقوم من النوم مبتسم وتقول "مش دلوقت يا امينة " طبعا مراتك هتشرشحلك و تطلع عينك وهية بتقولك " امينة ميين دي كمان ؟؟" نسيت اقولك احنا رجعنا بالليل .. لو مش مصدقني افتح الراديو هتسمع الاغنية الشهيرة اللي مكسرة الدنيا " العنب العنب العنب" ..متزعلش كدة ميمكن ابنك يلاقي الالة برضة و يقعد قعدتك دي و يقول " ياااااة ابويا دا كان رايق قوي مفيش عنده مشاكل زي اللي عندنا ".. متعرفش بكرة فية اية ..

يلا قوم لحسن انت لو قعدت تكمل القصة دي هتروح الشغل متاخر .. يلا

اية شكل الدنيا الحقيقي ؟

الرسول علية الصلاة و السلام ف رحلة الاسراء و المعراج عدا جنب واحدة ست عجوز شكلها بشع و جلدها مكرمش و ضهرها محني و شكلها هو الصورة الحية لمعني كلمة ( قبح )فسال الرسول علية الصلاة و السلام جبريل ( من هذة المراة يا حبريل ) جاوبة جبريل ( هذة هي الدنيا ) .. الدنيا اللي ف نظرنا جميلة و مليانة بكل المغريات و المباهج عبارة عن عجوز قبيحة منفرة .. الدنيا اللي بتقول عليها سعاد حسني بقي لونها بمبي و اللي بتقول عنها نانسي الدنيا حلوة عبارة عن خرابة بالمقارنة باللي مستني الانسان ف الاخرة

..المشكلة هي قصة قريتها و خليتني ف ذهول شديد .. ازاي الانسان بيعمل كل دا علشان خاطر دنيا قبيحة بالشكل دا و بينسي ان فية جنة ف الاخرة فيها ما لم تر عين ولا اذن سمعت و لم يخطر بقلب بشر ..القصة دي حصلت ف واحدة من قري اسيوط .. راجل غني اتوفي واخوة مش مستحمل الصدمة و الناس كانوا طول الوقت عمالين يهدوة .. ولما نزل التابوت القبر الاخ اصر انة ينزل وراة و يقعد معاة شوية .. المفروض دا ميحصلش بس الحانوتي وافق و قال يسيبة شوية مع اخوة يمكن يهدي شوية .. عدت نص ساعة و الكل قلق علي الاخ دا .. الحانوتي نزل القبر لقا الاخ متمدد و هو ميت جنب جثة اخوة اللي طلعها من جوة التابوت و ف ايدة ماسك عقود مبايعة و علي الارض مرمي ختامة كان عايز يسستعملها علشان يبيع لنفسة كل حاجة و يحرم ولاد اخوة الايتام من الفلوس حقهم

قصة تانية حصلت ف بورسعيد و القصة دي بقي بتكرر كتير جدا .. شاب يتيم حب بنت الجيران و راح علشان يتقدملها .. ابوها قابلة بكل طيبة و حنية و قالة بنتي متغلاش عليك و احنا بنشتري راجل .. وف نص الكلام سالة انت هتكون نفسك ازاي .. الشاب رد علية بسرعة و قالة انا هسافر ليبيا اقضي هناك سنة اكون كونت نفسي .. الشاب بعدها باسبوعين كان ف ليبيا و كان بيبعت كل مرتبة اول كل شهر لحماة اللي اعتبرة ابوة .. و بعد سنة الشاب رجع علشان يشتري الشقة و يكمل نص دينة لكن اتفاجئ بحماة الطيب الامير اتحول لشخص تاني خالص و طردة برة البيت و قالة انت ملكش حاجة عندي و اكل علية تحويشة تعب سنة كاملة داق فيها الذل و مراعاش ان الشاب دا يتيم .. الشاب مقالوش غيير كلمة واحدة ( حسبي الله و نعم الوكيل ) .. ربنا كرم الشاب و ف فترة قليلة كان اشتغل ف شركة و كون نفسة بسرعة و اتجوز و بقي لية اسرة و اولاد وف النحية التانية بنت الراجل الامير الطيب اتجوزت برضة بس سايس عربيات ف بنزينة وبيضربها كل يوم علشان تجيبلة فلوس

دنيا فانية مش كدة.. لو الانسان حط ف بالة الجملة دي مش هتلاقي حد بيسرق او بياكل حق يتيم او بيجري ورا كرسي و فطريقة بيدمر كل اللي حوالية او واحد بيرمي عيالة و يدمر اسرتة ف سبيل شهوة زايلة و لا حتي هتلاقي كدب ولا غش وفية امثلة كتيرة جدا لو كل واحد مننا بص حوالية هيلاقي الكل نسي ان فية جنة و نار و فية حساب و ثواب و عقاب و نسي ان الدنيا دي مجرد زيارة بتقضي فيها فترة و هتسيبها و تمشي

ودايما حط ف بالك كما تدين تدان

انت برنس زمانك

كل يوم الواحد بيصحي من النوم . يروح الشغل يتخانق شوية مع زمايلة و شوية مشاكل ف الشغل زي العادة و بعد كدة يتزاحم ف المواصلات علشان يروح و يدخل البيت يلاقي ام العيال لابسالة ارطة علي دماغها و بقايا الطماطم و البصل و روايح البهارات طالعة منها و العيال بتتنطط علي الكنبة اللي اتذل علشان يجيبها من دمياط . و ياكل لقمتين و يدخل ينام شوية ..ولما بتحط راسك علي المخدة و تقول هتنام تلاقي عفريت من العفاريت اللي انت خلفتها بيتنطط علي السرير و يقولك بابا عايز اروح الجنينة .. تروح نادة لام العيال تاخد الواد علشان انت نفسك تنام شوية و انت ف حالة الغيبوبة بين المنام و الصحيان بتتمني انك مش عايش العيشة دي و نفسك تكون امير او ملك من بتوع زمان

بس ارجع و اقولك لا ياعم انت ف حياتك اللي انت فيها احسن من الملك او الامير اللي بتتكلم علية .. فية منكم اللي هيبصلي باستغراب و فية اللي ممكن توصل انة يطلع اصوات غريبة من حنجرتة دغري و بعدها جملة ( اتلهي يا اهبل .. انت بتقول ان حالي احسن من حال الملك بتاع زمان ) .. هقولك ايوة

بص معايا يا سيدي .. الملك زمان لماكان بيحب يكلم ملك تاني ولا ابنة حتي اللي ساكن ف القصر اللي جنبة كان بيبعتلة رسول بجواب و الواد يروح رادد علية بجواب تاني و هكذا و ممكن يقضوا اليوم ف الحوار دا .. انت دلوقتي يدوب بالموبايل تتصل باللي انت عايزة ولو كنت كارت زي حالاتي تديلة رنة و تقفل او تبعتلة رسالة كلمني شكرا اللي تفقع دي

سيبك من موضوع الكلام ما انت نفسك مخنوق من الناس اللي حواليك و نفسك ف شوية هدوء .. طيب فكرت تروح البحر .. لما هتروح هتاخد عربية لحد متوصل البحر و تاجر خيمة ولا شمسية .. لكن زمان لو كنت ملك كنت هتاخد الحصان ولا الجمل و مسيرة يومين لحد متوصل البحر يعني هتشوف اللي عمر عينك مشافتة علي راي روتانا سينما

طيب لو سبتنا من موضوع البحر و الخروج .. مفيش برضة احسن من قعدة البيت .. لو الملك كان عايز يتغدي ولا يفطر هيقول للعبيد انا عايز كذا النهاردة و يحضر و يجيلة .. نفس النظرية عندك بس من غير عبيد و كلام من دا .. انت نفسك ف بيتزا مثلا اطلب اي محل بيتزا و تجيلك ف ربع ساعة و علي الموتسكل كمان ولا عايز تطلب فرخة ولا حتي طبق كشري حمضان ف اقل من ساعة يكون عندك

اخر حاجة الملك مكانش عندة حاجة يقضي فيها يومة لكن انت قدامك الدش و الريموت ف ايدك و حول ف القنوات يا معلم براحتك .. و اخر حاجة هقولهالك الملك مكانش بيتفرج علي هيفاء ولا نانسي .. يعني انت ف الاخر ملك زمانك واحمد ربنا علي العيشة ولا اية رايك يا برنس

يا بني احنا بنشتري راجل

يا بني احنا بنشتري راجل .. اليومين دول الجملة دي اختفت مش هقول ف كل مصر .. هقول ف اغلب البيوت المصرية .. و الاهالي دلوقتي بيبالغوا قوي ف طلباتهم علي العريس زي ميكون ذنبة انة حب بنتهم و اتقدم علشان يتجوزها .. و الامثلة علي كدة كتير جدا يعني مثلا مرة كنت قاعد ف الكلية و لقيت واحدة زميلتنا - هيا بيني و بينكم مش حلوة قوي يعني - قاعدة و زعلانة قوي .. قلتلها مالك يا ستي ؟ شايلة طاجن ستك لية ؟ تقولي انت عارف عصام .. قلتلها ايوة طبعا .. انا سمعت انة كان رايح يكلم والدك امبارح .. قالتلي ايوة .. بس طلع مبيحبنيش .. قلنلها ازاي يا بنتي دا الواد كان متشحتف عليكي .. قالتلي بابا قالة تمضيي علي وصل امانة بخمسين الف جنية و انا والله يا احمد علشان بحبة اقنعت بابا انهم يبقوا خمسة و تلاتين بس و لقيت عصام مرضاش .. مبيحبنيش .. مبيحبنيش انا طبعا ضربت كف علي كف ..هو رايح يتقدم لواحدة ولا بيشتري غسالة بالقسط

وموقف تاني برضة حصل واحدة مخطوبة لتاجر .. هو الصراحة الولد ابن حلال و راجل .. عزمهم مرة علي البحر و كانت والدتة عاملة مكرونة بالباشميل و اليوم معدي ظريف .. بس كان فية مشكلة واحدة .. ام خطبيبتة .. فكروا كدة اية ممكن يعمل مشكلة ف الكلام اللي انا قلتة .. اقولكم انا .. اصلة مجابش لحمة جنب المكرونة .. ( بيئة ) زي مقالت علية ام خطيبتة - السابقة - .. بذمتكم دا كلام جوازة تتفشكل علشان حتة لحمة

موقف تالت و دا بقي حصل ف الكوشة .. العريس و العروسة خلاص كتبوا الكتاب و هما قاعدين ف الفرح و شوية و هيطلعوا علي بيتهم .. و فجاة و من غير اي مبررات لقينا ابو العروسة بيزعق للعريس .. و السبب انة جايب تاكسي علشان يزف فية مراتة .. و الكل يقول لابو العروسة يا عم الحج مش مشكلة يعني لو اتزفت ف ليموزين حتي هيفرق معاها خلاص اتجوزوا و هيروحوا بيتهم و دا ابدا .. المهم كلمة من هنا و كلمة من هنا و هوب رما عليها يمين الطلاق .. وفين - علي الكوشة

و الامثلة كتير جدا علي طلبات الاهالي الغريبة من الشباب ..و زي ميكون الاهالي مش عايشين ف نفس الدنيا اللي احنا عايشين فيها و مش شايفين الشاب بيتعب قد اية علشان يكون نفسة و يجيب شقة و يوضبها و يجهزها .. ودا خلي فية ظاهرة منتشرة قوي ف شوارعنا و هيا ظاهرة الانتمة - يعني كل اتنين ماشين مع بعض و ظاهرة الجواز العرفي و ظاهرة الطلاق كمان ..ولو مش مصدقيني روحوا محاكم الاسرة و شوفوا وف الاخر تلاقي الاب او الام يضربوا كف علي كف و يقولوا باستغراب هو لية البنت قاعدة ف البيت متجوزتش لحد دلوقتي رغم انها زي القمر؟؟؟

و العاقبة عندكم ف المسرات

البلد دي عجوزة ولا لسة شباب ؟

احترت معاك . معاك غلبت انا ... دي احلي اغنية لحسام حبيب ف اخر البوم لية انا مش هحكم علي البومة لاني مش ناقد فني بس لقيت ان الجملة دي احسن بداية ووصف للوضع الحالي اللي موجود ف الصحافة المصرية

يعني الواحد معادش عارف هل البلد دي ام الدنيا و ان مفيهاش اي مشاكل و كويسة و زي الفل و كل العالم بيحبها زي مالجرايد الرسمية بتقول ولا البلد رايحة علي حفرة ملهاش قرار و مستقبل ضلمة مش باينلة شمس و ان الفساد بقي ف كل حتة حتي ف الحنفية اللي بتشرب منها علي راي جرايد المعارضة

حتي لما بيتكلموا عن مسئول معين تلاقي الصحف الرسمية بتمجد فية و تعظم فية و تقول دا مجيبتوش ولادة .. و تلاقي من النحية التانية صحف المعارضة مسكاة و هاتك يا ردح زي ميكون مبيطلعش من باب الوزارة الا تحت ايدة كل يوم اللي موجود ف خزنتها حتي الاخبار نفسها بقت متضاربة و متعرفش مين الصح و مين الغلط

يعني ابسط مثال علي كدة اخبار الاضرابات اللي بتحصل ف المصانع اللي بنسمع عنها اليومين دول .. تلاقي الصحف الرسمية يا متجهلاها يا اما بتتكلم عليها ف زاوية ميتة ف صفحة ضلمة ف الجرنان و معاها صورة لاتنين عمال شايلين يفط و خلاص .. تخليك تحس ان المظاهرات دي فشنك و مجرد شلة كانت سهرانة امبارح و طقت ف دماغهم يطلعوا بمظاهرة تاني يوم .. و من النحية التانية علي جرايد المعارضة تلاقي المظاهرة واخدة صفحتين ف اول الجرنان و الصور المشعللة لكمية عمال تحس ان مصر كلها جوة المظاهرة .. و تحس ان الدنيا بتغلي و مش هتسكت

وبرضة لما بيتكلموا عن دور مصر الريادي ف الوطن العربي .. تلاقي الصحف الرسمية بتقول ان لولا جهود وزير الخارجية او امين جامعة الدول العربية او مكالمة التليفون او الزيارة اللي قام بيها السيد الرئيس مكانتش اتحلت المشكلة دي وان موقعنا فعال و ان محدش بياخد خطوة الا لما يستشير رجال السياسة ف مصر ..وف النحية التانية ف جراييد المعارضة تلاقي ان دور مصر ف الوطن العربي راكد خامل ملوش اي لازمة و ان الفلسطينين علشان يحلوا مشكلتهم يروحوا قطر و اللبنانيين يروحوا السعودية و السودانيين بعد مكانوا يجيوا لمصر بقوا بيروحوا لليبا.. حتي ف الكورة تلاقي ف الصحف القومية يقولوا ان مصر صاحبت انجازات و بطولات و ان فرقها دايما مكسحة العالم ف كل الالعاب وواخداهم ذهاب و عودة و ان نجوم مصر زي ابو تريكة و متعب دول وصلوا لمرحلة ميسي و رونالدينهو و بيكهام لكن برضة الناس التانين مش راضيين يتفقوا معاهم علي راي و يقولك ان النجوم بتوعنا استهلاك محلي و انهم لو احتكوا مع فرق اوروبية هيبانوا علي حقيقتهم و ان كل النوادي علي وشك الانهيار و ان الرياضة ف مصر طريقها مسدود مسدود يا ولدي

و ندخل بقي علي الفن و السينما ولا اقولكم بلاش اصدعكم اكتر من كدة اقروا انتم و قارنوا و قولولي طيب انهي واحدة مصر .. مصر المبتسمة المشرقة اللي نحتها محمود مختار ف زي فلاحة جميلة ساندة اييدها علي ابو الهول .. ولا مصر عجوزة متهالكة الامراض و الاوبئة انتشرت ف جسمها و ملطخة نفسها باصباغ رخيصة علشان تشحت من برة مصر من وجهة نظر الجرايد الرسمية اللي بالنسبة ليها الحياة بمبي و ان المشاكل اللي موجودة ف البلد مشاكل صغيرة جدا ..ولا مصر من تحت النضارة السودا لصحف المعارضة اللي بتبين ان كل دقيقة ف مصر فية حالة فساد جديدةو ف الاخر هقول نفس الجملة .. احترت معاكي يا مصر يا ام السواقي السبع

يبقي انت اكيد ف مصر

عيسي نبي و موسي نبي و محمد نبي و كل من لة نبي يصلي علية .. دي جملة دارجة قوي ف مصر .. و معناها ان كل الاديان سواسية مفيش تفرقة بينهم .. دا لحد دلوقتي كلام جميل و كلام معقول محدش يقدر يقول حاجة عنة ..

لكن اللي رفع ضغطي من يومين و فقع مرارتي وحسسني ان كلام الوحدة الوطنية و شعارات يحيا الهلال مع الصليب كلام ف الهوا .. المسالة ان فية واحد صاحبي و احنا قاعدين علي القهوة - بالمناسبة اسمة امير وهو مسيحي - لقيتة متضايق قوي و زعلان .. فبنكشة و بقولة مالك هيا اريني - الحتة بتاعتة - زحلقتك ولا اية .. لقيتة بيقولي احمد هو انا فيا حاجة عيب .. قلتلة لا يا امير انت فلة .. قالي امبارح رحت قدمت ف شركة طالبة محاسبين و عملت الاختبارات و نجحت فيها و دخلت علشان اقابل المدير اللي المفروض انة هيمضي اوراق تعييني

لكن اول مقرا اسمي ف صورة البطاقة لقيت وشة ضرب الوان و بص لمدير شئون العاملين بصة غيظ و قالي معلش يابني مفيش نصيب و عرفت انة رفضني لاني مسيحي ..

طبعا قعدت اهدية و اقولة يمكن علشان السن انت لسة صغير و هما يمكن محتاجين ناس اكبر .. ولكن من جوايا كنت مقتنع بالسبب اللي قالة ..فعلا هل ذنبة انة من ديانة تانية . طيب ما احنا بنملي الدنيا زعيق و مظاهرات لو حد مس مسلم ف سنغافورة حتي بسوء .. طيب لية بنعمل اللي منرضاش ان يعملة غيرنا فينا .. برضة مرة رحت مصلحة حكومية علشان اخلص شوية ورق لقيت الموظف بيغتت علي مواطن ف نفس الوقت اللي خلص فية ورق اتنين تانيين و السبب انة مختلف معاة ف الديانة

و مش معني كدة ان التفرقة من المسلمين للمسيحين .. انا اعرف برضة شركات بتعين المسيحين بس و مبيشتغلش فيها مسلمين ..وفية ناس بتستغل المواقف الصغيرة دي و تقعد تصيح ف اوروبا ان مصر فيها اضطهاد ديني و ان حقوق المسيحين مهضومة و تقعد تهول المواقف بشكل بشع ..طيب لية منغيرش من جوانا

دا الرسول علية الصلاة و السلام كان بيتعامل مع اهل الكتاب .. و سؤال تاني للي يقول لا ياعم دا مسيحي ابن .. هل انت مسلم مبتغلطش وهل نيتك صالحة و صافية لله .. طيب مش الاسلام بيقول " يؤمن بالله و ملائكتة و كتبة و رسلة لا نفرق بين احد من رسلة " .. اذا كان الله سبحانة و تعالي بيقول كدة طيب انت لية بتطبق عكسة .. قبل متحكم علي شخص من ديانتة احكم علية الاول من شخصيتة .. اتعامل معاة و خلي نيتك صافية ..و ياسيدي زي ميتقال موسي نبي و عيسي نبي و محمد نبي وكل من لة نبي يصلي علية

نظرة الغرب للعرب

علشان تعرف وجهة نظر واحد فيك اعرف هو بيقول عليك اية .. يعني لو بيتكلم ف ضهرك اعرف من واحد صاحبك سوسة هو بيقول اية .. و لو كان غاوي يكتب و صحفي رخم اقرا هو كتب عنك اية

برضة تقدر تعرف اختلاف وجهة نظر الغرب فينا من افلامهم و مقالاتهم و كتبهم .. يعني ف الاول كانت النظرة للعربي انة شخص سلبي جدا و كانوا بيصوروة ف الافلام ياما لابس جلبية و قاعد قدام الخيمة و بيلعب حوالية قد عشرة خمستاشر عيل متربين و معفرين او لابس طربوش و بدلة كاملة ف عز الحر .. و الخلفية دايما لازم تكون صفرا و صحرا و كام جمل علي كام معزة و ميمنعش ان يكون فية بار من بتوع القرون الوسطي و كام رقاصة بترقص شرقي زي ميكون عندها مغص

يعني مثلا ف فيلم لورانس العرب - فاكرينة بتاع الاخ عمر الشريف و بالمناسبة دا اول فيلم عالمي لية - صوروا العرب بانهم شعب خااااااااااامل جدا ملوش اي لزمة ف الدنيا وقت مكان كل العالم بيحارب بالبنادق و المدافع هو لسة شايل سيف و حربة و رمح و ان العرب كانوا مستنين الاخ لورانس علشان يجمعهم و يقودهم للنصر و فية برضة رواية اسمها (الحاج ) دي بتاعت كاتب اسمة ليون اريز - بالمناسبة اخد عليها جايزة نوبل ف الادب - دي بيصور فيها الصراع العربي الفلسطيني - و قايمة علي حقيقة واحدة ( ارض بلا شعب لشعب بلا ارض ) ..و صورلك فيها الفلسطيني علي انة شخص يبيع ابوة علشان القرش و معندوش ضمير ولا دين .. الحاكم لازم يجلد شعبة علشان يعرف يحكمهم .. الابن عندة عقدة اوديب - و الحدق يفهم - و ف النحية التانية تلاقي اليهودي انسان عسول و وسيم و البنات العرب قلوبها تهفهف لما تشوف بن جوريون راكب علي فرسة الابيض و بيتحدي قائد القبيلة اللي بيخاف منة - قائد القبيلة مش بن جوريون طبعا اللي بيخاف

بعد كدة ندخل بقي علي فيلم يوم الاستقلال بتاع ويل سميث - ف اخر الفيلم المفروض الدنيا كلها بتحارب الغزو الفضائي تتفاجئ ان العرب بيطلعوا من الخيم و بيبصوا للسما باستعباط و علي وشهم جملة ( هو فية اية ؟؟)بعد احداث سبتمبر اتط العرب علي الخريطة .. يعني اتشالوا من خانة السالب لخانة العدو ودي حاجة مش وحشة .. بس تلاقي البطل الامريكاني بيموت خمسة ستة من العرب برصاصتين و صفة الغباء لسة موجودة .. لحد بعد عزو العراق

.. بدات النظرة تتغير شوية و اتحولنا للعدو الذكي ( زي مسلسل 24 ) و ف واحد من اجزاءة ظهر ضابط المخابرات العربي الذكي و العدو اللي كانوا فاكرينة عربي طلع منظمة بتستغل وجوة عربية علشان تغطي نشاطها

و دلوقتي اتغيرت النظرة برضة لنظرة الصديق الذكي - مش معني كدة اننا اتنقلنا من خانة العدو لا احنا لسة فيها برضة - بس ميمنعش اننا بدانا ناخد دور زي مسلسل( لوست ) اللي بينقذهم سعيد باختراعاتة و ذكائة مع العلم انة ف اول المسلسل قال انة من الحرس الجمهوري العراقي ( بتاع صدام ) يعني برضة كان من العدو و الظروف هيا اللي خليتة صديق

بالناسبة تعريف كلمة عربي ف قاموس الوبستر هو الجاهل - الامي - المعدوم الشخصية ...

اسعي ورا العصفور مش ورا الجارية

بعد حرب 1967 و بالضبط بعد منزل عبد الحليم حافظ اغنيتة الشهيرة ( ابو عيون جريئة ) مجلة من المجلات الفنية المشهورة وقتها نزلت مسابقة بين الشباب اسمها علي اسم الاغنية ( ابو عيون جريئة ) .. كل شاب يبعت صورتة و هو بيسبل للكاميرا و تتعرض الصور ف المجلة و قارئات المجلة تصوت مين يستحق اللقب .. بالصدفة الرئيس جمال عبد الناصر وقعت ف ايدة المجلة و كان بيقلب فيها لحد موقف عند المسابقة دي .. قعد يضحك و امر قائد الجيش انة يلم الشباب المتحمس دا و يحلقلهم شعرهم و يدخلهم الجيش

وبرضة لو رجعنا بالزمن شوية ايام الحكم العربي للاندلس ..كانت اخر القلاع العربية الموجودة ( غرناطة ) و حاول الملك ( فرينادو ) و زوجتة ( ايزابيلا ) محاولات مستميتة انهم يوقعوا بالمدينة الباسلة .. بس فشلوا .. فلجاوا للحل الوحيد ( الجواسيس ) .. عدي ف يوم واحد من الجواسيس علي شاب عربي و لقاة بيبكي فسالة ( ما يبكيك يا فتي ؟) رد علية الشاب ( كان فية طير ف السما رميتة بسم و فشلت ف اصابتة وقتها حسيت اني مستاهلش لقب عربي ) .. الجاسوس بعت للملك جملة واحدة ( لو حاربت اسبانيا كلها هتسقط ف ايد العرب ) بعد اكتر من 10 سنين .. عدا الجاسوس علي شاب عربي ولقاة بيكي و سالة ( ما يبكيك يا فتي ؟ ) رد علية الشاب و قالة ( كنت بحب جارية و هجرتني و حبت شاب تاني ) .. بعت الجاسوس للملك فريناندو ( الان يمكنك الحرب ) .. و قعلا وقتها وقعت غرناطة ووقع قصر الحمرا الشهير ف ايد محاكم التفتيش الاسبانية طبعا بعد مقريتوا الامثلة دي بتسالوا فايدتها اية

الشباب العربي اية اخبارة دلوقتي .. هل بيبكي علي العصفور ولا علي الجارية .. ولا بيبل لكاميرا علشان البنات تعجب بية .. هل لما بتسمع نشرة الاخبار و تقرا ان 10 اتقتلوا ف العراق او ف فلسطين .. فية حاجة بتتحرك جواك ولا اتحول الشهداء ف نظرك لمجرد ارقام .. النهاردة تلاتة بكرة سبعة بعدة عشرة .

.اي شاب محتاج يكون لية هدف و يكون لية قدوة يحاول يشبة نفسة بيها و يوصلها .. والا هيبقي ميت ف جسم انسان حي .. و داييما اسعي ورا العصفور مش ورا الجارية و انت هتحس ان حياتك بقي ليها هدف

طلاق علي الطريقة الالمانية

حادثة حصلت ف احدي المدن الالمانية و نقلتها كتير من الصحف الاوروبية وقتها و اصبحت واحدة من الطرق السهلة و البدائية برضة ف الحصول علي الطلاق ..

قلق عدد كبير من الناس علي صوت جارة ليهم معروفة بمشاكلها الكتير مع زوجها و صوتهم العالي اللي بقي علامة من علامات المدينة و اللي لو مسمعوهاش ف اليوم مرة يبقي حد من الزوجين دول تعبان ولازم يطمنوا علية .. كذا شاب خرجوا علشان يشوفوا اية القصة و جت وراهم سيدات - من النوع اللي عايز جنازة و يشبع فيها لطم - علشان يشوفوا اية سبب الصريخ اللي طالع ف نص الليل لقوا الست واقفة علي باب البيت بتصرخ و خايفة و جوزها عينيية شبة مقفولة و شكلة لسة صاحي من النوم علي صوت مراتة ..

و اتفاجئ الناس بالست دي بتقول ان جوزها بيحاول يقتلها بالسكينة .. طبعا الزوج المصدوم اللي مش عارف يستوعب لحد دلوقتي الموقف بيقول ( انا معييش سكينة ) بس مراتة كانت عاملة حسابها و كانت سايبة السكينة اللي استعملها جوزها ف تقطيع الفواكة بالليل جنب السرير و طبعا بصمات جوزها عليها و ماخدتش القضيية وقت ف المحاكم و كانت النتيجة محسومة ان الست اتطلقت و حصلت علي كل حقوقها ..

رغم سذاجة القصة دي بس كانت طريقة ناجحة جدا ف تطليق عدد من الستات ف المانيا .. جربوها مش هتخسروا حاجة لو اجوازكم خانقنكمو بالنسبة للرجالة بلاش سكاكين ف البيت وبلاش فواكة كمان .. و لو مشينا علي الطريقة المصري يبقي بلاش كمان اكياس سودا

الست ملاك نازل من السما ولا عفريت طالع من بطن الارض

الاسبوع اللي فات واحد صاحبي خطب .. وبقي كل ميقابلني يكلمني علي محاسن الخطوبة و ازاي ان عيلة خطيبتة بتشيلة علي كفوف الراحة و ان الخطوبة دي مفيش احسن منها و ان اكيد الجواز هيبقي احسن من كدة كمان علي اساس انهم هيبقوا عيلة واحدة و هيبقي زيتهم و سمنتهم و دقيقهم ف فرن واحد

..طبعا انا زي عادتي مرضيتش اسيبة يعيش الوهم و بما اني متجوز و مخلف فمن واجبي اني احذرة من المصيدة اللي هيقع فيها والكدبة اللي بيتقال عليها السعادة الزوجية .. اخدتة علي اول قهوة قابلناها و بعد منزلتلنا المشاريب بدات مرحلة النصييحة .. وطبعا منسيتش اطخن ف صوتيي و ابصلة علشان اديلة احساس ان الكلام اللي هييسمعة دا هو الحقيقة المرة

..شوف يا بني .. انا كنت زيك كدة ف فترة الخطوبة .. كانت حماتي - اللي وقتها كنت بقولها يا ماما - كانت تقابلني بكل ترحاب و حب علي اساس انهم بيشتروا راجل و اني ابنهم ..و كانت تقولي ان امها - جدة مراتي - الله يرحمها شافتني ف المنام قبل متقدم باسبوع و قالت ان هيجي راجل قلبة طيب و حليوة و كويس هياخد البنت ..

و مراتي بقي اللي كانت وقتها خطيبتي .. كانت اجمل انسانة شفتها ف حياتي و كانت مهتمة بنفسها و بلبسها و بيا برضة .. كنت بحسد نفسي اني هاخد القمر دا و اني هعيش هارون رشيد زماني ..

اما بقي بالنسبة لابوها فمكانش يقدر يبدا يومة الصبح غير ميصبح عليا و يقولي ابني و ابو حميد و الكلام الحلو دا بتاع الابهات وبعد الجواز اتقلبت الاية .. ووقع الفار ف المصيدة ..

و نبدا بحماتي الليي كنت بقولها يا ماما - بقيت برضة بقول لما اشوفها ( يا ماما ) بس من الخضة .. و اتحولت ف معاملتها من الام لمرات الاب .. انت مش واخد بالك من بنتي .. انت قلبك قاسي قوي قوي انت مش بتحس كدة و كدة .. و بقيت كل مفتح بقي اتكلم تبصلي بصة لو كانت رصاص كان زماني بقيت مصفة و اخدت بقي تاخد الدور الطبيعي للحما .. اللي اخدتة قبلها ماري منيب

وبالنسبة لمراتي فحدث ولا حرج .. اتحولت من ملكة جمال راس البر لعفريت طالع من بطن الارض .. الشعر السلك و الوش اللي يدوب ميعرفش من مستحضرات التجميل غير الصابونة .. وبدلنا البرفانات الغالية بروايح البصل و الطاطم و البهارات .. و بدلنا اسبراي الشعر بارطة و غيرنا الهدوم الشيك بالعباية الشوال

و انا مش احبطك بس دايما افتكر الجملة دي ( امي ف نظري ملاك نازل من السما و ف نظر ابويا عفريت طالع من بطن الارض )وعلي العموم يا سيدي مبروك و ربنا يتمم بخير .. ثواني يا جماعة جايلي مكالمة .. الو .. ايوة .. بتقول اية .. فسخت الخطوبة .. لية يابني هو انت لحقت .. دي الخطوبة دي اجمل فترة ممكن تعيشها و مفيش احسن من الجواز .. دا انا يا بني

ديار ليلي

امر علي الديار ديار ليلي

اقبل ذا الجدار و ذا الجدار

وماحب الديار شغفن قلبي

ولكن حب من سكن الديار

علشان البنت الجمية الرقيقة اللي سرقت عقل و قلب الشاعر العربي كان بيلمس الحيطان المصنوعة من طوب و احجار و رمل .. مش علشان الاحجار نفسها و لكن علشان فكرة ان ممكن تكون محبوبتة لمست الحجر بايدها او سندت ضهرها علية او ضلها زين الجدار دا هو دا الحب .. الحب اللي يخلي المحب ممكن يوصل لمرحلة انة يبكي علي الجدار او علي سماعة التليفون اوعلي منديل او وردة او ورقة من المحبوبة ممكن تكون شخبطت فيها او كتبت فيها اي كلام .. بس المهم ان اي حاجة من دول اكيد لمس ايديها و شم ريحتها و حس بيها .. الحب بيخلي المحب دايما بيتصور حبيبتة زي شعاع نور بيخاف يمد ايدة علية ليكسرة ..

دايما مصورها ارق و احلي انسانة ف نظرة .. لما بتضحك بيحس ان الدنيا بتضحك معاها و لما بتبتسم بيحس ان العصافير اللي بتغرد دي بتقول شعر ف ابتسامتها .. ولما بتتنهد بيحس ان الورد نفسة واخد ريحتة الحلوة منها .. و لما بتبص لعينيها بيشوف فيها براءة غزالة جميلة قدام سهم صياد .. و كل ميشوف منظر جميل بيفتكرها .. يعني البحر واخد صفاءة من عينيها و ان الليل واخد سوادة من شعرها و ان النجوم واخدة ضوءها من سنانها و ان النسيم واخد رقتة من صوتها ..

و ان اي اغنية او قصيدة مكتوبة علشانها هياو اي هدية بتجيبها لية بتبقيي عندة زي ميكون ملك الدنيا و ما فيها و اعظم مثال علي كدة قصيدة كتبها العقاد لما محبوبتة اهديتة بلوفر من صنع ايديها و قال فيها :

الم انل منك فكرة

في كل شبكة ابرة

و كل عقدة خيط

و كل جفرة بكرة

نسجتة بيديك

علي هدي ناظريك

اذا ما احتواني فاني

مازلت في اصبعيك

مفيش احسن من كلام العقاد اختم بية الموضوع بس بجد الحب احساس جميل .. لو حسيتة ف مرة مش هتقدر تعيش من غيرة .. هتتنفسة ف كل ثانية و هتحس فية بكل نبضة .. هتعييشة بجد ف كل لحظة