امشي جنب الحيط ... من الامثال الشعبية القديمة اللي اتربينا و كبرنا و احنا بنسمعها و اللي بتنادي بالسلبية .. يعني ارفع شعار ( و انا مالي ) هتعيش سليم وف امان لكن لو حاولت تتكلم هتشوف اللي عمر عينك مشافتة - زي مبيقولوا ف روتانا
يعني و انت صغير هتلاقي والدتك و هيا بتديك السندوتش و نازل المدرسة بتقولك ( اقعد ف حالك و ملكش دعوة بحد ولو حد شتمك قولة ربنا يسامحك و متتخانقش مع حد ولما يضرب جرس الفسحة كل السنندوتش كلة لوحدك ) وطبعا مش هتنسي بصتها اللي بصتهالك بمعني انا هعرف لو مسمعتش الكلام .. و انت زي اي طفل مطيع لازم هتسمع الكلام
نتفرج بقي و انت تلميذ ف ابتدائي و تكون قاعد ف الفصل و تلاقي المدرس بيشرح درس و انت مش فاهمة .. تيجي ترفع ايدك علشان تقولة معلش عيد تاني .. يقولك ( ما انت قاعد سرحان مش مركز معايا .. و انت لو مركزتش يا ابن ال ... - لفظ بيدل علي بيئة و تربية راقية - هضربك وهوريك و ... ) .. والنتيجة انك لو مفهمتش بعد كدة هتلاقي نفسك تقول و انا مالي لما اروح ابقي ازاكر او هتتقال تاني ف الدرس انا لية اجيب لنفسي التهزيق
لما تدخل الكلية تلاقي والدك هيديك النصايح بتاعت : ملكش دعوة بالاسر بتاعت الكلية .. و متتكلمش ف السياسة و بلاش موضوع المسرح و الجماعات بتاعت الكلية دي ركز ف مذاكرتك و بس .. انا عايزك تنجح كل سنة بامتياز و مش عايز حاجة تشتتك .. ولو انت مطيع برضة هتدخل الكلية و هتمشي جنب الحيط وهتخرج منها زي مدخلت بزيادة شوية معلومات و شهادة هتتبروز علي الحيط ومن غير اي خبرة ف الحياة
لما تدخل الجيش و مهما كانت الاوامر اللي اتقالتلك ملكش الحق حتي تعترض لان القاعدة الاساسية ( نفذ و بعد كدة ابقي اتظلم ) يعني من الاخر خليك سلبي والغي عقلك يا دفعة .. اسمع و نفذ من سكات و متحاولش حتي تفكر
تيجي بقي تشتغل و يمكن تلاقي حاجات غلط بتحصل حواليك تلاقي زمايلك يقوللك ( يا عم و انت مالك .. امشي جنب الحيط لحسن فلان دا شراني ولو قلتلة دي غلط هيوديك ورا الشمس ) .. يعني برضة خليك سلبي يا برنس و ملكش دعوة باي حاجة
الفكهاني بيغش الفاكهة اللي بيدهالك هتقول خلاص بقي يعوض عليا ربنا .. سواق التاكسي هيطلب منك اجرة اعلي علي مشوار اقل هتقول ادفع و خلاص انا مش بتاع مشاكل .. البقال هيقلل ف الميزان هتقول مش مشكلة هيا جت علي الشوية دول .. واي حد يسالك انت سلبي ؟ ..هتقولة لا طبعا بس انا مؤمن بالمثل اللي بيقول ( امشي جنب الحيط و لو قدرت امشي جواة ) .. او هتهز كتافك و هتقولة يا عم و انا مالي
No comments:
Post a Comment